O  LUPO
BOLETÍN D'A COLLA UNIBERSITARIA POR L'ARAGONÉS
FANZINE ELEUTRONICO EN ARAGONÉS
Numero 19 (agüerro 2000)


 NOTIZIAS

 LEI Y AMOSTRANZA, CONTINAMOS IGUAL
O prozeso d'elaborazión d'o proyeuto de lei de luengas contina sin ufrir nobedaz importáns. De todas trazas, bi ha dos feitos que endican que o Gubierno d'Aragón ha preso iste tema con un minimo de dezisión. Por un costau, encargó antis de l'estíu un estudio soziolingüistico a Francisco Llera (catedratico de sozioloxía d'a Unibersidá d'o Pais Basco, qui ya fazió un estudio sobre l'asturiano), ta la zona de l'Altoaragón. D'atra man, nimbió una carta a os monezipios d'as zonas bilingües ta conoxer a suya opinión sobre a cofizialidá. As preguntas que o Gubierno feba a os conzellos yeran: "1-¿Desean la cooficialidad, junto al castellano, de otra u otras lenguas?; 2-En caso de que así fuera, ¿qué lengua o qué lenguas deberían serlo en el ámbito de su territorio?; 3-Cualquier otra cuestión o matización referente a las lenguas que el consistorio considere de interés", lo que no dixa de trucar o ficazio cuando istas custións ya eban estadas tratadas en o Ditamen d'a Comisión de Politica Lingüistica y en a Lei de Patrimonio Cultural Aragonés. Manimenos, denguno d'os resultaus d'istas dos consultas s'han feito publicos, ni esiste un compromís firme sobre a calendata de presentazión d'o proyeuto de lei (ni sobre o suyo conteníu). A o respeutibe, o presidén d'Aragón, Marcelino Iglesias, manifestó en o debate sobre l'estau d'a comunidá que a lei s'aprebará en a prosima añada, pero sin concretar más, adempribiando un atro posible ranzoneyo (o zaguer compromís estió presentar o proyeuto en ista añada, ta aprebar-lo en empezipiar o nuebo periodo de sesións, en febrero).
Sobre l'amostranza en as escuelas, tampoco no s'ha produzíu garra enante. Continan fendo-se clases en as mesmas cuatro poblazións, en as mesmas malas condizións, y a profesoralla (que ixo si, agora ye achustada dreitamén por o gubierno) pasa de treballar meya chornada, a treballar solo que un terzio de chornada. En ista añada s'ha puesto beyer que a consellera d'educazión Mª Luisa Alejos-Pita, no beye con buenos güellos a l'aragonés, y no cambiará cosa a situazión autual de l'amostranza dica que no se beiga obligada por a lei de luengas.

 A COMISIÓN EUROPEA CONBOCA ADUYAS
A Comisión Europea ha feito una conbocatoria d'aduyas ta aizións de promozión y proteuzión d'as luengas y culturas rexionals y minoritarias (EAC/19/00), con una dotazión total de 2,5 millons d'euros, ta proyeutos que caldrá presentar antis d'o 6 de nobiembre. As condizions d'a clamadura pueden leyer-sen en o Diario Ofizial d'as Comunidaz Europeas d'o 16 de setiembre d'o 2000 (DOCE C 266/07, 16/9/00), y en:
http://europa.eu.int/comm/education/mercator/langmin.html
http://www.guiafc.com/
(En caso de presentar bella solizitú, demandar-nos informazión autualizada, u en: langmin@cec.eu.int).
D'atra man, o Parlamento Europeo y o Consello d'Europa ha declarau o 2001 como Añada Europea d'as Luengas (dezisión num. 1934/2000/CE d'o 17 de chulio d'o 2000, DOCE d'o 14/09/00), fendo tamién una conbocatoria de proposas (EAC/66/00), que pueden consultar-sen en (DOCE C 257/06, 8/9/00) y en: http://www.guiafc.com/

 CURSOS D'ARAGONÉS

 Como cada agüerro, barias asoziazións empezipian os suyos cursos d'aragonés. Gosan tener un durazión de 75 oras alto u baxo, 3 oras por semana. Bi ha rans d'iniziazión y d'afundamiento.

-Asoziazión Cultural Nogará:
Durazión: D'o 6 de nobiembre dica mayo.
Pre: 8.000 pztas. (6.500 estudians y esqueferaus)
Turnos: Lunes y miercols de 20 a 21,30 (en iniziazión, posibilidá de martes y chuebes de 20 a 21,30). Biernes de 19 a 22 oras. Sabados de 10 a 13 oras.
Más informazión y inscripzións: Nogará, C/. Gabín, 6, Zaragoza. Tel.: 976 39 07 08 (clamar de 19,30 a 21,30),
e-mail: nogara@posta.unizar.es
Tamién ufrierta cursos ta difuera de l'asoziazión: Institutos, lugars,...

-Fablans:
Durazión: D'o 23 d'otubre dica mayo.
Pre: 9.000 pztas.
Turnos: Lunes y miercols de 20,30 a 22 oras. Sabados de 10 a 13 oras.
Más informazión y inscripzións: Fablans, C/. Coso 150, prinzipal dreita, Zaragoza. Tel.: 976 20 10 12 , e-mail: fablans@pangea.org
Se fará una presentazión o 20 d'otubre a las 20,30 oras, en l'Instituto Publico "Pedro de Luna" (Madalena), fendo-se-ie una ripresentazión d'os "Diaples d'a Uerba" y un socalze.

-C.R.E.A.B.A.
Durazión: D'o 5 d'otubre dica mayo.
Más informazión y inscripzións: CREABA, C/.Escuelas, 10, Andorra (Teruel).Tel.: 978 88 00 89 (Chusé Antón Gracia), 677 47 15 32 (Marco Negredo), e-mail: mnegredo@samca.com

-Centro Aragonés de Barcelona-Casa de Aragón.
Se fará una presentazión o diya 16 d'otubre a las 19,30 oras en a biblioteca d'a siede.
Más informazión y inscripzións: C/. Joaquín Costa, 68, Barzelona.
 

 A RECUPERAZIÓN D'O DANZE DE LEZERA                                                                                         Fernando Bravo

 O diya 4 d´Agosto se tornó a representar o danze de Lezera en onor a Santo Domingo de Guzman. En 1917 estió a zagera begada que s'amostró en o lugar, encara que en 1988 y 1989 una colla de chobens amostrón parti d´o danze, que se remontó por meyo de un lolo d´o lugar que se remeraba d´a gran parti d'os bersos y d'os presonaches que lo feban (alto u baxo 3000).
 En primeras se fa una representazión de moros y cristianos, dimpués se fan unos bersos entre o rapatán y o pastor, que fan bersos arredol d´as chens d´o puesto, y ta rematar, se fa o danze. No quiero rezentar-tos cosa, por que tenez que ir a beyer-lo, ye asabelo de poliu, encara que ista bez o biento arguelló l'auto.
 Dende astí queremos dizir a toda ixa chen que ha feito rebilcar o danze, que entadebán ta fer-lo atras añadas.

 ZAGUERAS PUBLICAZIÓNS

Libros:
-"Labordeta y A Buerda". Mariano Coronas, ed. O Gurrión.
-"Guia turistica de L'Ainsa".Ed. Prames.
-"El aragonés del Biello Sobrarbe". Chabier Tomás, ed. Instituto de Estudios Altoaragoneses.
-"José, un hombre del Pirineo". Severino Pallaruelo, ed. Prames.
-"Os camíns sin fin". Pablo Antón Marín, ed. Xordica-Editors asoziatos.

Discos:
-"Danzas del Sobrarbe". La Orquestina del Fabirol, ed. DGA (se bende de conchunta con o libro omonimo de Isabel Riazuelo)
-"Regalando las nieves". Fagüeño.

Queremos remerar-tos que podez consultar a lista de toz os libros en aragonés publicaus dende 1972, en a paxina web d'a "Agencia española del ISBN", http://www.mcu.es/bases/spa/isbn/ISBN.html , eslexindo "aragonés" como opzión de rechira en o campo d'a luenga de publicazión. Se i pueden trobar 146 tetulos.

 SORTEU-ENCUESTA
 O Lupo fa un sorteu de 5 maquetas en CD d'a colla de mosica folk "Dechusban". Ta partizipar-ie, nimbianos un mensache ta colla@posta.unizar.es con bel dato de contauto, y bel comentario u soxerenzia sobre o boletín.

 IX PREMIO "ANA ABARCA DE BOLEA" TA LIBROS DE POESIA EN ARAGONÉS

 O Consello d'a Fabla Aragonesa fa la clamadura d'a nuena edizión d'o premio "Ana Abarca de Bolea", correspondién a l'añada 2000, seguntes os siguientes regles:
1-Os treballos consistirán en un libro inedito de poemas escritos en aragonés.
2-Se presentarán tres copias d'os treballos, feitos a maquina u en ordinador, a doble espazio y a una sola cara, y con una amplaria d'entre 600 y 1.200 bersos.
3-Os treballos lebarán un tetulo y un lema, os cuals se cuaternarán e una carpeta postal zarrada, drento d'a que se meterán o nombre y dos apellius y l'adreza de l'autor/a, asinas como lo lugar y calendata de naxenzia y a profesión u quefers.
4-Os treballos s'endrezarán por correu zertificau ta o Consello d'a Fabla Aragonesa, trestallo postal 147, E-22080 Uesca, antis d'o 30 d'otubre d'o 2000.
5-O fallo d'o premio y as presonas que composan o churau se ferá saber publicamén en abiento d'o 2000.
6-O premio consitira en 100.000 pezetas ta l'autor/a y a publicazión d'a obra ganadora.
7-O churau podra dezidir no atorgar o premio a denguna d'as obras presentadas, asinas como atorgar menzión espezial a beluna/s y aconsellar a suya publicazión. L'autor/a con menzión espezial recullira un premio de 25.000 pezetas. En dengún caso pueden trestallar-sen os diners d'o premio y d'a menzión espezial; si alcaso, o churau podria atorgar una segunda menzión espezial, sin de pre en diners, pero podendo cansellar tamien a publicazión d'a obra. A suya dezisión ye inapelable.
8-A obra ganadora y, en o suyo caso, a obra u obras que tenesen menzión espezial, serán publicadas senguntes as normas graficas de l'aragonés emologadas en abril de 1987, por a editorial Publicazións d'o Consello d'a Fabla Aragonesa, qui s'alza os dreitos d'a primera edizión, a cuala tiendra una edizión minima de 500 exemplars.
9-Os treballos presentaus que no se reclamen en o plazo de 30 dias naturals, que empezipiaran a contar dende a calendata en que se faiga publica a dezisión d'o churau, quedaran en propiedá d'o Consello d'a Fabla Aragonesa.
10-A presentazión a iste premio suposa l'adempribio d'istos regles.
Ista nuena edizión d'o Premio "Ana Abarca de Bolea" se fa con l'aduya economica d'a Diputación Provincial de Huesca.

 MENSACHES CURTOS

-A Federazión Europea de Casas d'o Pais ha editau a Guía Europea Multilingüe de Comunidaz Culturals, un catalogo con 32 luengas minoritarias, cadaguna con una balurazión. Bi ha una parti dedicada a l'aragonés, feita con  a colaborazión d'o Ligallo de Fablans de l'Aragonés.

-O diya 10 d'otubre se ferá en Uesca un omenache a Rafel Andolz, en a siede d'a Diputazión Probinzial de Uesca (Porches de Galizia, 4), a las 19 oras. Amás se i presentará un libro de Francho Nagore, y Carlos Castán i ferá una conferenzia.

- O programa de radio "Boira Preta" sobre mosica y cultura aragonesa, empezipia una nueba etapa en Radio MAI de Zaragoza (103.5 FM), emitindo-se-ie os domingos de 22,30 a 24 oras. Tos remeramos os orarios de atros programas de radio y TB: "Charramos" (Radio Uesca, 1080 AM, sabados de 15,30 a 16), "O Mirallo" (Radio Ebro de Zaragoza, 105.2 FM, martes de 22 a 23 oras), "Con Rasmia" (Radio MAI de Zaragoza, 103.5 FM, biernes 21 a 22 oras), "Chino-Chano" (Telebisión local d'Andorra, terzer miércols de cada mes a las 19 oras, y se torna a emitir a las 22,30 y o chuebes a las 13 oras).

-Webs d'intrés:
Colla ta la Replega y Esfensa de l'Aragonés d'o Baxo Aragón (CREABA): http://www.galeon.com/creaba
Bocabulario d'abes en aragonés: http://www.jalon.net/tiraraina/voc-aves1.htm
Lesico de Sos d'o Rei Catolico: http://members.es.tripod.de/sos_del_rey_catolico/
Lesico de Fuenferrada (Teruel): http://www.galeon.com/fuenferrada/
Lista de distribuzión sobre temas aragoneses: http://www.rediris.es/list/info/aragon-l.html
Lista de distribuzión de folk aragonés: http://www.egroups.com/group/folk_aragones
Lista de distribuzión sobre luengas minoritarias de l'estau: http://www.egroups.com/group/lenguasminoritarias
Lista de distribuzión sobre soziolingüistica: http://br.egroups.com/group/socioling
Lista de distribuzión sobre Monegros: http://www.egroups.com/group/monegros
Bureau Europeo ta las Luengas Minoritarias: http://www.eblul-bic.be
Promozión de l'emplego sozial d'as luengas minoritarias: http://www.cymuned.org.uk/spanish/overview.html
Proyeuto d'a Fundazión Wolkswagen ta la documentazión de luengas minoritarias:
http://www.volkswagen-stiftung.de/english/merkblat/merkdoku.htm
Asociación Guayente: http://www.lasalle.es/asociacion/index.html

-L'Asoziazión Cultural Nogará ha cambiau a suya siede, a nueba adreza ye Carrera Gabín, 6, Zaragoza (a o canto de l'anterior siede). Entre as nobedaz, una cafetería que ubrirá cuasi de contino y s'inaugurará en as fiestas d'o Pilar.

- O pasau mes de chulio se creyó o Rolde Fablán Suraragonés, un nuebo fren conchunto d'as asoziazións que treballan por l'aragonés en a probinzia teruelana. I partizipan: Colla de Fabláns d'o Sur, Colla Meyebal de Tergüel, Colla ta la Replega y Esfensa de l'Aragonés en o Baxo Aragón y A. C. Azud/Azut de l'alta Xiloca.

-Si quiers recullir o boletín "Mercator Media Newsletter", sobre luengas minoritarias d'Europa y os suyos meyos de comunicazión, demanda-lo en: zyw@aber.ac.uk

-A demba de cultura y turismo d'o Gubierno d'Aragón organiza 16 cursos de formazión en o patrimonio etnoloxico y mosical (danzas de l'Alto Aragón, tradizións orals, construzión d'intrumentos populars, didautica d'a cultura popular aragonesa, ...). Son endrezaus ta profesionals de l'aizión cultural, sozial u educatiba y se ferán entre nobiembre d'o 2000 y mayo d'o 2001. Informazión y solizituz (dica o 6 d'otubre): Serbizio d'informazión y documentazión administratiba, edifizio Pignatelli, Zaragoza, tel.: 976 714111, http://www.aragob.es/sid/internet/novedad.htm

-Entre o 18 y o 20 d'Abril d'o 2001 se zelebrará en Bristol (Inglaterra) o terzer Simposium Internazional sobre Bilingüismo, si quiers recullir informazión d'o mesmo, escríbe-nos u demanda-la en:  Third International Symposium on Bilingualism (ISB3), University of the West of England, Faculty of Languages and European Studies, Coldharbour Lane, Bristol BS16 1QY ,Great Britain. E-mail: ISBERG@uwe.ac.uk
http://www.uwe.ac.uk/facults/les/research/bilingual/frames.html

-En as prosimas fiestas d'o Pilar de Zaragoza, se i ferán una buena ripa d'autuazións de collas aragonesas. D'o domingo 8 d'otubre a o domigo 15, en a plaza de San Bruno y a las 21 oras, bi autuarán (por orden cronoloxico) Fagüeño, Tintirinullo, Escandallo, La Ronda de Boltaña, Biella Nuei, La Orquestina del Fabirol, Hato de Foces y os Dulzaineros del Bajo Aragón. En a plaza Miguel Merino, a las 18 oras, Somerondón ferá una muestra de baile, mosica y indumentaria aragonesa (os diyas 8, 11 y 14) y Fagüeño un atra muestra de mosica os diyas 10 y 13. O miercols 11 a las 23 oras, en o rezinto ferial d'a carrera Miguel Servet, bi abrá un conzierto de José Antonio Labordeta, Mallacán, Ixo Rai, La Ronda de Boltaña y Antón Abad.

Colaboran en iste numero: Fernando Bravo, Fernando Sánchez, Daniel González.
O Lupo ye un boletin de baldes, ta suscribir-se-ie u dar-se-ne de baxa no cal que nimbiar un mensache ta la nuestra adreza indicando-lo. S'adempribian soxerenzias y colaborazións.
(O Lupo es un boletin gratuito, para suscribirse o darse de baja sólo hay que enviar en mensaje a nuestra direccion indicándolo. Se aceptan sugerencias y colaboraciones).
COLLA UNIBERSITARIA POR L'ARAGONÉS (C.U.A.)
Edifizio Interfacultaz, Pedro Cerbuna 12, 50009 Zaragoza
colla@posta.unizar.es
http://www.unizar.es/colla