Lupo 13

_________________________________________________________________________

           XXXX          XX      XX XX XXXXX    XXXX
          XXXXXX         XX      XX XX XXXXXX XXXXXX
          XX XX         XX      XX XX XX XX XX XX
          XX XX         XX      XX XX XXXXXX XX XX
          XX XX         XX      XX XX XXXXX   XX XX
          XX XX         XX      XX XX XX      XX XX
          XXXXXX         XXXXXX XXXXXX XX      XXXXXX
           XXXX          XXXXXX   XXXX   XX       XXXX
_________________________________________________________________________

BOLETIN D'A COLLA UNIBERSITARIA POR L'ARAGONES
FANZINE ELEUTRONICO EN ARAGONES
_________________________________________________________________________

Numero 13 (Febrero-Marzo 99)

-------------------------------------------------------------------------
NOTIZIAS
-------------------------------------------------------------------------

INAUGURADA A ESCUELA D'ARAGONES DE MONZON
En o pasau mes de chinero s'inaguro en a capital d'a Zinca Meya a escuela de Luenga Aragonesa "Nabata", empentada de conchunta por o Consello d'a Fabla Aragonesa y o Ligallo de Fablans de l'Aragones, con o refirme economico d'o Conzello de Monzon, a Comision Europea y a Diputazion Probinzial de Uesca. En iste zentro se faran tanto cursos d'Aragones de barios rans, como autibidaz culturals complementarias (seminarios sobre mosica, cheografia, tradizions, recuperazion de fiestas y chuegos tradizionals, escursions, intercambeos con escuelas oczitanas), creyando-se-ie un rolde ta l'emplego cutiano d'a luenga. Ta apuntar-se a os cursos u demandar informazion se puede clamar ta o telefono 974 400700, estension 320.

A D.G.A. TIENE "DUDAS TEUNICAS"
O Gubierno d'Aragon ha meso como desincusa ofizial ta continar incumplindo o Ditamen d'a comision de pulitica linguistica d'as Cortes d'Aragon, a esistencia de dudas teunicas en o proyeuto de Lei de Luengas y ta mirar-se de resolber-se-las ha demandau un informe a la Unibersida de Zaragoza. A o respeutibe, o deputau Jose M. Becana (PSOE) presento dos preguntas parlamentarias a o Consellero d'Educazion y Cultura, Vicente Bielza (PP), ta saber, d'una man, cualos son ixos problemas teunicos y a que departamento d'a Unibersida a demandau l'informe, y d'atra, si a D.G.A. ha sinalau a la Unibersida de Zaragoza como instituzion consultiba ofizial, y si estase asinas a chustificazion ta fer-lo. Tamien en zagueras IU y CHA han feito publicos comunicaus de protesta por l'autitu d'o gubierno d'Aragon en ista custion.

APROBADAS AS LEIS DE PATRIMONIO CULTURAL Y DE SUZESIONS
O pasau 25 de febrero s'aprebo en as Cortes Aragonesas a Lei de Patrimonio Cultural d'Aragon, que sera una nueba e importan ferramienta ta la defensa y promozion d'o patrimonio cultural aragones, entendiu dende una ambiesta ampla. En a lei se considera (por meyo d'una enmienda de CHA) a l'aragones y o catalan como parte d'iste patrimonio, y insta a o gubierno aragones a fer una Lei de Luengas que las declare coofizials, (iste feito suposa que o ran legal ta la obligazion de presentar a Lei de Luengas, ye mas gran que o conseguiu con o ditamen d'a comision de politica linguistica). Istos dos puntos d'a Lei de Patrimonio conton con o boto en contra de o PP.
D'atra man, dos semanas antis s'aprebo a Lei de Suzesions, que entrara en bigor o diya de San Chorche, con a que por primera bez as Cortes Aragonesas lexislan sobre una parte tan importan d'a Cultura Aragonesa como ye o Dreito Zibil Aragones. Ista lei reculle a posibilida de fer testamento en cualsiquiera d'as luengas d'Aragon.

-------------------------------------------------------------------------
ZAGUERAS PUBLICAZIONS
-------------------------------------------------------------------------
Libros:
-"Premio literario en Aragones Lo Grau: III (1992)- IV (1997)" (Carmen Castan, Chuan Carlos Marco, Ana Tena, Chabier Tomas. Ed. Consello d'a Fabla Aragonesa).
-"Baxo a molsa" (Francho Nagore. Ed. Xordica)

Discos:
-Dulzaineros del Bajo Aragon, "Quienta borina".

-------------------------------------------------------------------------
II TROBADA D'ESTUDIOS Y RECHIRAS ARREDOL DE L'ARAGONES
-------------------------------------------------------------------------
L'Instituto d'Estudios Altoaragoneses, con a colaborazion d'o Consello d'a Fabla Aragonesa y o Zentro de Profesors y Recursos de Uesca, organiza a "II Trobada d'Estudios y Rechiras Arredol d'a Luenga Aragonesa y a suya Literatura", que se zelebrara en Uesca entre o 18 y o 20 de nobiembre de 1999. Os ochetibos d'a mesma son achuntar cada dos anadas a os estudiosos de l'aragones, entrecambear informazions, enamplar o zerclo de rechiradors, empentar os estudios sobre a luenga aragonesa, puyar o ran zientifico d'os mesmos y espardir-los con a publicazion d'as autas.
En a trobada se feran una serie de ponenzias por parti d'os profesors combidaus (bi asistiran muitos d'os mas importans filologos d'Europa espezialistas en fablas romanicas), y se i presentaran comunicazions por parti de toz os partizipans que lo deseyen, que seran de tematica libre (aragones muderno, meyebal, gramatica istorica, lesicografia, toponimia, soziolinguistica, istoria d'a luenga, amostranza, literatura, folklore...).
Ta incribir-se-ie, solo que como asisten, caldra nimbiar una fuella d'inscrizion antis d'o 28 d'otubre d'o 99. Si amas se presenta bella comunicazion, caldra nimbiar tamien una ficha d'a comunicazion antis d'o 28 de mayo d'o 99, y o testo d'a mesma antis d'o 14 d'otubre. Tot isto, chunto con a copia d'a tranferenzia bancaria d'a conduta d'inscrizion, caldra nimbiar-lo ta:
Instituto d'Estudios Altoaragoneses. Carrera d'o Parque, 10. 22002 Uesca.
A conduta ye de 3.000 pztas., u de 5.000 incluyindo-ie a chenta de rematanza, que cal ingresar en a cuenta 0103-0084-21-01-0002376-8 (cuenta d'o Banco Zaragozano a nombre d'o IEA).
Se entregara un diploma d'asitenzia emologau por o Departamento d'Educazion y Cultura. Ta mas informazion clamar a o 974 240180 (IEA).
Ta informazion sobre meyos de transporte y alox: 974 292100 (of. turismo de Uesca).

-------------------------------------------------------------------------
PREMIOS LITERARIOS
-------------------------------------------------------------------------
-O Conzello de Sietemo y o Consello d'a Fabla Aragonesa combocan o V Premio Literario en Aragones "Billa de Sietemo" (1999). Bi abra dos premios chenerals, uno de narrazion curta (con una estension d'entre 5 y 25 fuellas) y unatro de poesia (d'entre 100 y 400 bersos), y un premio espezial ta la millor obra de naxius u residens en o Semontano. Os treballos caldra nimbiar-los por triplicau a o Conzello de Sietemo, 22125 Sietemo (Uesca), antis d'o 31 de marzo. O premio ye dotau con 100.000 pztas. ta os premios chenerals y 50.000 pztas. ta l'espezial, y a publicazion d'as obras. Os regles completos pueden demandar-sen en o Conzello de Sietemo y en o Consello d'a Fabla Aragonesa (plazeta d'o Conde de Guara, 3. 22001 Uesca. Tel.:974 224716).

-O Consello d'a Fabla Aragonesa comboca o Premio Internazional de nobela
curta "Chuse Coarasa". As obras abran d'estar escritas en aragones (en
cualsiquier barieda) y tendran una amplaria d'entre 50 y 150 fuellas (por
una sola cara y a doble espazio). O premio ye dotau con 100.000 pezetas y
a publicazion d'a obra por a editorial Publicazions d'o Consello d'a
Fabla Aragonesa. O plazo d'almision remata o 30 de setiembre de 1999. Os
regles completos se publicaran en a rebista "Fuellas" u pueden demandar-
sen en o Consello d'a Fabla Aragonesa).

-Os ganadors d'a zaguera edizion d'o premio literario "Lo Grau" han estau:
En poesia, Roberto Cortes por "Cuaderno irlandes" y Chabier Tomas (aczesit) por "Gambada campestre". En narrazion, Ana Tena por "La bollonera", Baudilio Colominas (aczesit) por "Aquellos faixos d'olibera radius" y Alberto Bolsa (aczesit) por "Recuerdos d'a nineza en Salas Altas".

-------------------------------------------------------------------------
LEI D'ERENZIOS D'ARAGON Cherardo Gimeno
-------------------------------------------------------------------------
O pasau 11 de febrero, as Cortes aragonesas ban aprebar por unanimida y dezaga d’un consenso en o que i partizipon toz os grupos politicos, a nueba lei de d’erenzios d’Aragon.
En o nuestro dreito zebil aragones, isto suposa o mayor trango entadeban dende l’aprebazion d’a encara bixen Compilazion de dreito foral de 1967, que estio reformada beintizinco años dimpues, en os articlos que yeran concaraus a la Costituzion espanola.
A nueba lai ye teunicamen buena y amas regula toz os aspeutos d’a suzesion mortis causa, cosa que a nombrada Compilazion no feba.
As nobedaz mas importans d’a nueba lai d’erenzios son istas:

A lexitima: Dica o 23 d’abril bi ha la obligazion d’o lexador (testador) de dixar dos terzios de l’erenzio ta los suyos fillos, dimpues d’a dentrada d’ista lei , s’enampla la liberta d’o lexador y asinas solamen caldra dixar a meta de l’erenzio ta los fillos.

Parellas de feito: En o dreito aragones, tradizionalmen bi ha la posibilida de fer testamento de conchunta en as parellas casadas. Isto ye bedau en o dreito comun espanol. A nueba lei enampla a posibilida de fer testamento mancomunau ta las parellas de feito. Asinas que o lexislador ha modernizau o nuestro dreito aragones tradizional, cosa que ye asabelo positiba.

A fiduzia: O lexador puede nombrar a qui le pete ta que meta las condizions que deseye ta lo cumplimiento de l’erenzio. En a biella compilazion solamen esistiba ista posibilida de fiduzia ta lo conyuguio.

Fablas: os aragoneses podran emplegar cualsiquiera d’as fablas d’Aragon ta redautar os pautos suzesorios u os testamentos. Ista ye, a reconoxedura mas importan feita por una lei de camin ta la cofizialida de l’aragones y o catalan en o nuestro pais (anque se poderba dizir que a reconoxedura mas importan ye a de l’estatuto d’autonomia, pos churidicamen ye una norma mas importan).

-------------------------------------------------------------------------
O CANTON LITERARIO Cesar Matias
-------------------------------------------------------------------------
La Bal de la Bida (Elisa Garzía Dealbert, Ed. L.F.A.)

La bal de la bida ye prenzipalmen una nobela d’amor, que se desemolica en "a bal". Ista bal reflexa la bal de Chistau (do bibe l’autora d’o libro), en a nobela, o mesmo que en a reyalida, tamien lis intentoron meter una linia d’alta tension.
A Istoria prenzipia en o sieglo XXI, pero en una situazion muito diferen a la nuestra, ya que alli la chen d’as ziudaz biben baxo a tierra; y en a bal toz treballan como agricultors u con animals, pero con rispeto ta la naturaleza.
Tamien ye intresan as trazas de tratar os costumbres d’a bal, y tal como mete en a contraportada "se i descubre la reyalida sozial autual d’a montana pirinenca aragonesa".
Iste libro t’apercaza dende l’empieze, y cuan cuasi rematas, a lo millor notas que sobran bellas paxinas, pero yo creigo que isto ye normal en un libro que en tien 250.
Dende un ambito lingüistico, "la bal de la bida" ye escrito en modalida chistabina, (con o pasau perifrastico, a forma berbal d’as primeras presonas d’o plural).
A ran presonal, ista nobela ye indispensable en a biblioteca aragonesofablan, y por ixo tos la recomiendo como prosimo libro ta leyer.

-------------------------------------------------------------------------
MENSACHES CURTOS
-------------------------------------------------------------------------
-A Colla Unibersitaria por l'Aragones ye formando una nueba sizion en Uesca. Si yes unibersitario d'iste campus y quiers colaborar-ie, mete-te en contauto con nusotros.

-Pasaus os esamens, ya se tornan a fer as reunions semanals d'a Colla (os biernes no festibos de 20 a 21 oras, en a cambra de coleutibos de l'edifizio Interfacultaz, en a planta 4). Si quiers conoxer-nos, biene-te-ne.

-O Chustizia d'Aragon ha inagurau a suya paxina en internet, l'adreza ye: http://www.eljusticiadearagon.com

-L'Asoziazion Cultural Nogara ubre en a suya siede (carrera Palafox de Zaragoza) un serbizio de cafeteria-bar os sabados de 17 a 24 oras.

-A paxina presonal en aragones de Cherardo Gimeno enampla os suyos contenius, incluyindo-ie informazion sobre a CUA, l'adreza ye:
http://www.jura.uni-tuebingen.de/~s-gig1

-A colla mosical "Ixo Rai" quitara t'a carrera un nuebo disco en o mes mayo.

-O Chustizia d'Aragon y a Faculta de Dreito son fendo un curso de dreito aragones, con a partizipazion como conferenzians d'autoridaz academicas y politicas. L'asistenzia ha estau un esito, asinas que se suposa que bi abra muitas mas edizions.

-A CUA ha feito bella colaborazion en o programa de radio "Territorio Siux" d'a Onda Local d'Utebo (se ascuita sin garra problema dende Zaragoza). Iste programa s'emite os biernes de 20,30 a 21,30 oras (101.1 FM).

-O Ligallo de Fablans de l'Aragones cambia a suya siede de Zaragoza. A nueba adreza ye: Coso, 150, prinzipal dreita, (y amas, trestallo postal 488, 50080 Zaragoza).

-O prosimo biernes 26 de marzo a las 20 oras, se presentara en a siede de l'Instituto d'Estudios Altoaragones en Uesca (carrera d'o Parque, 10), o nuebo libro de Francho Nagore "Baxo a molsa", editau por Xordica.

-D'o 22 a o 26 de marzo s'amuestra en l'Instituto "Maria Moliner" de Zaragoza (carrera San Bizen Ferrer), una esposizion sobre Cultura Aragonesa (feita por l'Instituto Aragones d'Antropoloxia).

-L'Asoziazion de Gaiters d'Aragon organiza entre abril y chunio barios cursos d'instrumentos tradizionals (dulzaina, gaita de boto, tambor...). Mas informazion en l'AGA: Carrera San Juan Cabrero, 20 de Zaragoza, tel.: 976 279488, e-mail: fagu@public.ibercaja.es

-O bispau de Balbastro-Monzon ha zediu o Monasterio de San Beturian a o Gubierno Aragones, ta que iste desembolique un plan de restaurazion y promozion.
_________________________________________________________________________

O Lupo ye un boletin de baldes, ta suscribir-se u dar-se de baxa no cal que nimbiar un mensache ta la nuestra adreza indicando-lo. S'adempribian colaborazions y soxerenzias.
(O Lupo es un boletin gratuito, para suscribirse o darse de baja solo hay que enviar un mensaje a nuestra direccion indicandolo. Se aceptan colaboraciones y sugerencias).
_________________________________________________________________________

              COLLA UNIBERSITARIA POR L'ARAGONES (C.U.A.)
          Edifizio Interfacultaz, Pedro Cerbuna 12, 50009 Zaragoza
                  E-mail: 181991@cienz.unizar.es
_________________________________________________________________________