O LUPO
BOLETÍN D'A COLLA UNIBERSITARIA
POR L'ARAGONÉS
FANZINE ELEUTRONICO EN ARAGONÉS
O cuarteno s'adedica a la definizión y conserbazión en cheneral d'o patrimonio lingüistico aragonés (tanto biens materials como inmaterials). O zinqueno fabla de l'amostranza, se i guaranzia o dreito a l'amostranza de l'aragonés y o catalán en as zonas coofizials, pero de traza boluntaria, y permite, tamién boluntariamén y si bi ese una "requesta sufizién", l'emplego como luenga beicular de l'aragonés y o catalán, en preescolar y primaria. En a zona no coofizial, tamién se i podrá amostar aragonés y catalán, en o caso de requesta sufizién.
En o seiseno s'espezifica o papel d'as luengas minoritarias en l'alministrazión. En as zonas coofizials os prozedimientos d'as alministrazions autonomica y local serán bilingües, y en a zona no coofizial o prozedimiento se fará en castellano, pero también se podrá endrezar-se ta l'alministazión autonomica en aragonés y catalán, asinas como ta las Cortes y O Chustizia. Os boletins ofizials d'Aragón, Cortes y Diputazions Probinzials podrán tener bersions en aragonés y catalán (pero no s'obliga a que siga asinas). En as zonas coofizials os documentos y debates d'os conzellos podrán fer-se tanto bilingües como solo que en una d'as dos luengas coofizials. Tamién se i declara a coofizialidá d'a toponimia bilingüe en as zonas coofizials, se reconoxe o dreito a l'emplego d'os antroponimos, empenta a conoxedura de l'aragonés y o catalán entre os treballadors d'o seutor publico y refirma a os meyos de comunicazión en luengas minoritarias. En o testo se i da tamién un plazo de tres años ta l'aplicazión gradual d'istas midas.
A la finitiba, un testo que cuenta con trestallos ambiguos y prou prudens, pero que reculle, en linias chenerals, buena parti d'as reibindicazions que dende o mobimiento por a esfensa de l'aragonés se biene fendo dende fa decadas, y que si s'amillora en o prozeso de modificazions que agora se ubre, y s'aplica con dezisión, podrá fer onra ta l'edebenidero d'as luengas minoritarias d'Aragón. (L'abamproyeuto puede consultar-se en a web d'a Colla Unibersitaria por l'Aragonés: http://www.unizar.es/colla ).
Más informazión:
Boletín Ofizial d'Aragón. Num. 32, 16 de
marzo d'o 2001.
Web d'o Gubierno d'Aragón: http://www.aragob.es
Testo completo en: http://www.unizar.es/colla
APREBADA A CARTA EUROPEA D'AS LUENGAS MINORITARIAS
O Congreso d'os Deputaus y o Senau aprebón en
rematando l'añada 2000 l'adempribie d'a Carta Europea d'as Luengas
Rechionals o Minoritarias, feita en Estrasburgo en nobiembre de 1992. A
ista Carta, España fa una declarazión, an se indica qué
partis d'a Carta s'adempribian (esiste un menimo obligatorio) y qué
luengas minoritarias bi ha en l'estau. A o respeutibe, o testo inizial
d'a declarazión deziba: "España declara que, a los efectos
previstos en los citados artículos, se entienden por lenguas regionales
o minoritarias, las lenguas reconocidas como oficiales en los Estatutos
de Autonomía de las Comunidades Autónomas del País
Vasco, Cataluña, Illes Balears, Galicia, de la Comunidad Valenciana
y de la Comunidad Foral de Navarra".
Dau que ista redauzión dixaría sin de proteuzión a luengas como l'aragonés, l'asturiano, l'aranés y o catalán d'Aragón, prezisamén las que más aduya amenistan, o deputau José Antonio Labordeta (CHA) presentó dos enmiendas, la una con a fin de modificar ixe parrafo y proposando a redauzión: "El Estado Español declara que a los efectos previstos en los citados artículos, se entienden por lenguas regionales o minoritarias, las lenguas reconocidas en los Estautos de Autonomía y/o en la legislación que los desarrolla de las Comunidades Autónomas de Aragón, Asturias, Cataluña, Euskadi, Galicia, Islas Baleares, Navarra y Valencia", la otra ta adibir o testo: "En todo caso, y atendiendo a la situación de cada una de ellas, se prestará especial atención a aquellas cuya situación sea más grave con el objetivo prioritario de salvaguardarlas previsto en el artículo 7 de la Carta".
Istas dos enmiendas contón con o refuse d'a resta de collas parlamentarias, pero se plegó ta l'alcuerdo de adibir a la redauzión orichinal o testo: "Asimismo, España declara, a los mismos efectos, que también se entienden por lenguas regionales o minoritarias las que los Estatutos de Autonomía de Aragón, Asturias y Cataluña protegen y amparan en los territorios donde tradicionalmente se hablan". Con tot y con ixo será difízil que ista Carta tienga bel efeuto positibo ta l'aragonés en l'esdebenidero, pos no se zita de traza esplizita en l'Estatuto.
Ta lo que si puede que sirban istas iniziatibas ye ta que l'aragonés se conoxca en as Cortes Chenerals, y que se'n fable con una normalidá que dica agora no esistiba. Por exemplo tamién ye en tramitazión una proposizión de lei presentada por o Parlamento de Cataluña (y un atra parellana d'o Parlamento de Nabarra) que, d'alcuerdo con a campaña "Estampetas plurals", demanda que os siellos y efeutos postals emitíus por a Fabrica Nazional de Moneda y Timbre se metan en zirculazión en todas as luengas ofizials pero "sin perjuicio de que también puedan emitirse y ponerse en circulación en las lenguas asturiana, aragonesa y occitana, de conformidad con la realidad plurilingüe del Estado".
Más informazión:
Boletín Ofizial d'as Cortes Chenerals. Congreso
d'os Deputaus. VII Lechislatura. Serie C. 22 de setiembre d'o 2000. Num.
43-2.
Diario de Sesions d'o Congreso d'os Deputaus. Comisions.
VII Lechislatura. Num. 86. Asuntos Esteriors. Sesión
num. 7 d'o 19 d'otubre de 2000.
Boletín Ofizial d'as Cortes Chenerals. Congreso
d'os Deputaus. VII Lechislatura. Serie C. 31 d'otubre d'o 2000. Num.43-4.
Diario de sesions d'o Senau. VII Lechislatura. 20 d'abiento
d'o 2000. Num. 30.
Boletín Ofizial d'as Cortes Chenerals. Congreso
d'os Deputaus. VII Lechislatura. Serie B. 19 de chulio d'o 2000. Num. 80-1.
Web d'o Congreso d'os Deputaus: http://www.congreso.es
Web d'o Senau: http://www.senado.es
Estampetas plurals: : http://www.om-plural.org/segells/ara/index.html
O ZENSO LINGÜISTICO YA CUENTA CON DINERS
En o zaguer debate sobre os presupuestos d'Aragón,
s'adempribió una enmienda ta firmar un combenio con l'Instituto
Nazional d'Estadistica, con a fin de que en o zenso de l'añada 2001
se i meta un formulario sobre custions lingüisticas, como ya se fazió
en l'añada 1981. Tamién se i aprebó un atra enmienda,
ta la reyalizazión d'unas chornadas d'espardidura d'a riqueza y
dibersidá lingüistica d'Aragón. As dos enmiendas estión
presentadas por a CHA y refirmadas por toz os partíus. Agora caldrá
beyer si o gubierno executa istas partidas presupuestarias.
D'atra man, o deputau Chesús Bernal fazió en nobiembre una pregunta parlamentaria a la consellera d'educazión, Mª Luisa Alejos-Pita, sobre as midas que pensaba prener debán d'as solizituz d'amostranza de l'aragonés en as escuelas que han feito una cuarentena de monezipios de l'Alto Aragón (beyer O Lupo 20). A consellera, informó d'a creyazión d'una unidá adedicada a las luengas minoritarias dentro d'a Direuzión Cheneral d'Esbielle Pedagochico, y fazió una declarazión de buenas intinzions, pero dixó platero que no faría cosa nueba dica que no se aprebase a lei de luengas.
Más informazión:
Boletín Ofizial d'as Cortes d'Aragón, num.94,
21 d'abiento d'o 2000 (enmiendas 482 y 620).
Diario de Sesions d'as Cortes d'Aragón, pleno
num.35, d'o 21 d'abiento d'o 2000.
Diario de Sesions d'as Cortes d'Aragón, pleno
num.31, d'o 16 de nobiembre d'o 2000 (pregunta 503/00).
Web d'as Cortes d'Aragón: http://www.cortesaragon.es
CONCURSO LITERARIO EN ARAGONÉS "UNIVERSIDAD
DE ZARAGOZA"
O Secretariado de Actividades Culturales d'o Vicerrectorado
de Proyección Social d'a Universidad de Zaragoza, con a colaborazión
d'o Consello d'a Fabla Aragonesa, fa o clamamiento d'o I Concurso Literario
"Universidad de Zaragoza", en a dople modalidá de narratiba e poesía
en aragonés d'alcuerdo con as bases siguiens:
1-O Concurso s'adotará, en cadaguna de as modalidaz,
con un unico premio de DOSZIENTAS ZINCUANTA MIL pezetas e a publicazión
de os testos premiatos en as dos modalidaz en una coedizión de Prensas
Universitarias de Zaragoza e Publicazions d'o Consello d'a Fabla Aragonesa.
2-Podrá presentar-se á iste I Concurso
cualsiquier presona, con tal que os suyos testos sigan escritos en luenga
aragonesa.
3-A presentazión d'orichinals se ferá en
diyas de treballo, de 9 a 14 oras, en o Secretariado de Actividades Culturales
(Edifizio d'a Retoría, primer solero), dende a publicazión
d'istas bases dica o diya 4 de mayo de o 2001.
4-Os orichinals no irán firmatos, e caldrá
que se'n presenten tres copias, fendo cuaternar en o encapezamiento ro
tetulo trigato, acompañatos d'una carpeta u cubierta zarrata, en
o esterior de a cual se i cuaternará o debandito tetulo. En o interior
de a carpeta u cubierta se i meterá una nota escrita a maquina u
con retulazión apropia, endicando ro nombre e apellidos de l'autor,
adreza e telefono, asinas como una fotocopia d'o Decumento Nazional d'Identidad.
5-A estensión d'os testos oszilará, en
a modalidá de narratiba, entre 10 e 50 fuellas mecano-grafiatas
á dople espazio por una sola cara e con una meya de 30 linias por
70 espazios, acatandose que podrá presentarse u bien relato u bien
bella colezión de relatos. En a modalidá de poesía,
a estensión será d'entre 125 y 250 bersos.
6-Os treballos presentatos, de tema libre, abrán
d'estar orichinals e ineditos, que no sigan estatos premiatos en garra
atro concurso, e sin siñal ni firma que denunzie a suya prozedenzia.
7-En entregar os treballos, a presona que concursa recullirá
una fuelleta de contrimuestra, que li ferá onra ta replegar a obra
malas que o concurso siga rematato. A torna d'orichinals escomenzipiará
o 2 de chulio de 2001, podendo ros autor/as autoras replegar as obras presentatas
dica o 27 de chulio de 2001. Dimpués d'ixe tiempo s'acatará
que as obras no replegatas son estatas donatas por os autors/as autoras
á ra Universidad de Zaragoza, que podrá fer libremén
con eras o que lis parixca combenién.
8-O churato será trigato por o Vicerrectorado
de Proyección Social d'a Universidad de Zaragoza entre presonas
de reconoxito prestixo literario u unibersitario. Dito Churato completará
con o suyo criterio as omisións u dudas que podese planteyar a entrepretazión
d'istas bases.
9-A dezisión de o Churato será inapelable
en toz os casos.
10-O Churato podrá declarar disierto ro premio
con o que ye adotato ro concurso.
11-A dezisión u resoluta de o Churato se ferá
publica á trabiés de os meyos de comunicazión locals.
12-A partizipazión en iste concurso presuposa
l'azeutazión entegra d'istas bases.
VI PREMIO LITERARIO EN ARAGONÉS "BILLA DE SIETEMO"
O Conzello de Sietemo, con a colaborazión d'o
Consello d'a Fabla Aragonesa, fa o clamamiento d'o VI Premio Literario
en Aragonés "Billa de Sietemo", d'alcuerdo con os siguiens regles:
1-Bi abrá dos premios chenerals: uno de narrazión
curta e un atro de poesía; e un premio espezial ta ra millor obra
de poesía u de narrazión presentata por presonas que sigan
naxitas u residens en o Semontano.
2-Os traballos se presentarán escritos en aragonés
e abrán d'estar ineditos.
3-D'as obras caldrá presentar-ne tres copias e
serán feitas en fuellas de midas A4, a una sola cara e a dople espazio.
A suya estensión deberá estar entre 5 e 25 fuellas a maquina
en narrazión curta e entre 100 y 400 bersos en poesía.
4-Os treballos lebarán un tetulo e una embotada,
os cuals se cuaternarán en un sobre zarrato achunto, drento d'o
que se meterán o nombre e os dos apellius de l'autor, asinas como
l'adreza e o telefono, lugar de naximiento e os datos biograficos que l'autor
creiga de menister. Toz os treballos concurren a os premios chenerals;
os que sigan en condizions de concurrir, antimás, a o premio espezial
deberán cuaternar chunto a ra embotada: (Semontano).
5-Os treballos se nimbiarán por correyo u se ferán
plegar de cualsiquier atra traza ta o Conzello de Sietemo, 22125 Sietemo
(Uesca), antis de o 15 d'abril de 2001.
6-O fallo de o premio y a composizión de o churato
se ferán publicos o dia 28 d'abril de 2001.
7-Os autors/as de os treballos ganadors serán
recompensatos con un pre de 100.000 pezetas (600 euros) en o caso de os
premios chenerals e de 50.000 pezetas (300 euros) en o caso de o premio
espezial.
8-O churato podrá dixar sin atorgar bel premio
u atorgar bel aczésit si lo creye preziso. Asuya dezisión
será inapelable.
9-As obras distinguitas con premio u aczésit se
publicarán en un libret por a editorial Publicazions d'o Consello
d'a Fabla Aragonesa. Como ye de dar, a imprentazión d'os testos
se ferá d'alcuerdo con as normas graficas de l'aragonés.
10-Os treballos que no se reclamen en o plazo de 30 días
naturals, dende a calendata en que se faiga publica ra dezisión
de o churato, quedarán en propiedá de o Consello d'a Fabla
Aragonesa e d'o Conzello de Sietemo, que podrán publicar-los si
lo chuzgan d'intrés.
11-A entrega d'os premios se ferá o día
28 d'abril de 2001, en Sietemo.
12-A presentazión a iste premio presuposa l'azeutazión
d'istos regles.
V PREMIO "O GUA" DE FALORDIAS E NARRAZIONS TA NINOS/AS
O Consello d'a Fabla Aragonesa fa o clamamiento d'o V
Premio de falordias e narrazions ta ninos/as "O Gua", correspondién
a l'año 2001, que se reglará por as normas siguiens:
1-O premio se fa cada tres añadas. Iste ye o zinqueno
clamamiento e corresponde a l'año 2001.
2-Os treballos que se i presenten serán ineditos
e pueden estar un solo cuento u falordia, u bien diferens narrazions curtas.
3-Podrán estar escritos en cualsiquier bariedá
de d'aragonés, pero en toz os casos, siguindo correutamén
as normas graficas de l'aragonés.
4-As falordias u narrazions serán ta ninos e ninas,
mozez y mozetas de 6 ta 12 añadas. Se balurará muito espezialmén
o carauter didautico, asinas como l'achustamiento d'o bocabulario e as
construzions a ra edá.
5-L'amplaria d'o testo d'os treballos será d'entre
20 y 50 fuellas a maquina u ordinador, a dople espazio (entre 50.000 y
125.000 carauters).
6-Os treballos podrán lebar debuxos (a una tinta,
d'amplaria 12x17 zm. u proporzional a ixas midas). Anque no ye obligatorio,
ya que se trata de narrazions ta ninos e ninas, ye muito consellable que
biengan con debuxos. O churato balurará a suya calidá e conchunzión
con o testo.
7-Os treballos podrán estar feitos por una sola
presona u por barias.
8-Os treballos s'endrezarán ta: Consello d'a Fabla
Aragonesa, trestallo postal 47, 22080 Uesca. En os treballos no se i meterá
o nombre de l'autor u autora. S'achuntará una carpeta zarrada, con
o tetulo en o esterior, drento d'a que se cuaternarán os datos de
l'autor u autora, u autors u autoras (espezificando-bi quí ha feito
ro testo e quí os debuxos).
9-O plazo d'entrega d'orichinals rematará o 30
de setiembre de l'añada 2001.
10-A dezisión d'o churato, que ye inapelable,
asinas como a suya composizión, se ferá publica en o mes
d'otubre de l'año 2001.
11-O premio consistirá en a edizión d'a
obra ganadera e un premio en metalico de 100.000 pezetas (601,01 euros).
A edizión, con un minimo de 500 exemplars, se ferá d'alcuerdo
con as normas graficas de l'aragonés, emologatas en abril de 1987,
por a editorial Publicazions d'o Consello d'a Fabla Aragonesa. As obras
no premiatas quedarán en propiedá d'o Consello d'a Fabla
Aragonesa de no meyar demanda en cuentra por parti de l'autor u autora
drento d'o plazo d'un mes dende que se faiga publica ra dezisión
de o churato.
12-O churato podrá no atorgar o premio a denguna
de as obras presntatas u atorgar bel aczésit, si lo creye combenién.
O feito de partizipar en iste premio presuposa l'azeutazión d'istas
normas de partizipazión.
-L'Instituto d'Estudios Altoaragoneses, o Consello d'a Fabla Aragonesa y l'Instituto Aragonés d'Antropolochía han publicau un libro clamau "Homenaje a Rafael Andolz", an se i recullen artíclos sobre antropolochía, lingüistica, creyazión literaria, estando-ne muitos en aragonés.
-O Consello d'a Fabla Aragonesa ha feito o clamamiento de l'año 2001 ta la beca de rechira lesicografica "Mosén Rafel Andolz", dotada con 200.000 pezetas. Os proyeutos cal presentar-los antis d'o 30 de marzo en a siede d'o Consello d'a Fabla Aragonesa, an puede demandar-se os regles completos (tamién podez leyer-los en a rebista "Fuellas" lum.140, u demandar-nos-los a nusatros): Consello d'a Fabla Aragonesa, trestallo postal 147, 22080 Uesca / Abda. d'os Danzantes, 34, baxo, 22005 Uesca. Tel.: 974 231513.
-A publicazión eleutronica "A Rebista" ha inagurau
una nueba adreza en o rete: http://www.arebista.com
Antimás han feito un nuebo serbizio de notizias
en aragonés ta mobils con teunolochía WAP, podez consultar-las
en: wap.cocotero.com/arebista
-Tamién Fabla Sur tiene agora nueba adreza con dominio propio: http://www.fablasur.org
-L'Asoziazión Cultural Nogará ubre de contino a suya cafetería (Peña Borina), en a carrera Gabín, 6 de Zaragoza. Podez ir-ie os biernes y sabados dende as 20 oras.
-Os ganadors d'o VI Premio Literario en Aragonés "Lo Grau" han estau, en poesía, Roberto Cortés por "Cheografía personalizata", y en narratiba, Chabier Tomás por "O tascal d'o buco". Tamién han recullíu un aczesit, en poesía, Antón Gil por "Purnas y chislas", y en narrazión Elena Chazal y Ana Giménez por "El retratista" y "Ixos tiempos güegatizos" respeutibamén.
-Si quiers recullir a rebista "Ruxiada" d'a Colla de Fablans d'o Sur en formato eleutronico, puez demandar-la en l'adreza cp.de.las.anejas@centros4.pntic.mec.es
-A Escuela d'Aragonés de Nogará fa una colaborazión en o programa de Radio Zaragoza (93.5 FM) "A vivir Zaragoza", que s'emite os domingos de 12 a 14 oras.
-Entre o 29 y o 31 d'otubre se zelebrará en Barzelona o V Congreso Internazional de Traduzión, adedicau a las luenguas menos traduzidas, podez informar-tos-ne en http://www.fti.uab.es/ti2001 , cg.traduccio2001@uab.es
-En l'adreza http://www.univ-tlse2.fr/erss/clid/occitan/aragonais.html tenez un intresán dizionario birtual multilingüe (incluyindo-ie l'aragonés).
-O Gubierno d'Aragón ha feito una pachina sobre
patrimonio etnografico aragonés, que podez bisitar en:
http://www.aragob.es/edycul/patrimo/etno/etn_presentacion.html
-Nueba pachina en aragonés d'a colla de mosica
tradizional aragonesa "Boira Preta": http://pagina.de/boirapreta
Más pachinas d'intrés:
Feria Expolangues: http://expolangues.reed-oip.fr/
Añada Europea d'as Luengas: http://www.eurolang2001.org
Chobenalla d'as Minorías d'Europa: http://www.yeni.org