_________________________________________________________________________

           XXXX          XX      XX  XX  XXXXX    XXXX
          XXXXXX         XX      XX  XX  XXXXXX  XXXXXX
          XX  XX         XX      XX  XX  XX  XX  XX  XX
          XX  XX         XX      XX  XX  XXXXXX  XX  XX
          XX  XX         XX      XX  XX  XXXXX   XX  XX
          XX  XX         XX      XX  XX  XX      XX  XX
          XXXXXX         XXXXXX  XXXXXX  XX      XXXXXX
           XXXX          XXXXXX   XXXX   XX       XXXX
_________________________________________________________________________

          BOLETIN D'A COLLA UNIBERSITARIA POR L'ARAGONES
                 FANZINE ELEUTRONICO EN ARAGONES
_________________________________________________________________________
 

                                    Numero 14 (Abril-Mayo 99)

-------------------------------------------------------------------------
 NOTIZIAS
-------------------------------------------------------------------------

 REUNION D'A PLATAFORMA EN UESCA
O pasau 27 de marzo se reunio en a siede d'o Consello d'a Fabla Aragonesa en Uesca, a Plataforma ta la Esfensa d'as Fablas Minoritarias d'Aragon. En a mesma se i charro sobre a situazion d'ature que sufre o proyeuto d'a Lei de Luengas d'Aragon, fendo-se una dura critica a o Gubierno d'Aragon por a suya autuazion en ista custion. Tamien se fazio una balorazion positiba, de l'aprebazion d'as Leis de Patrimonio Aragones y de Suzesions (beyer O Lupo 13). S'alcordo fer una nueba reunion a meyaus d'o mes de chunio, ta balorar os resultaus d'as esleuzions autonomicas, y empentar as aizions que correspondan.

-------------------------------------------------------------------------         CHORNADAS DE LUENGA ARAGONESA
-------------------------------------------------------------------------
 A Colla Unibersitaria por l'Aragones organiza en Uesca dos conferenzias sobre dibersos temas arredol d'a Luenga Aragonesa. Tos endicamos o programa y tos animamos a que bi acudaz.

Chuebes 13 de mayo:
"A situazion d'o mobimiento d'esfensa de l'Aragones", por Chesus Gimenez Arbues (secretaire d'o Consello d'a Fabla Aragonesa), y "L'Aragones en a Unibersida", por Francho Nagore (miembro d'o departamento de Linguistica  Cheneral y Ispanica d'a Unibersida de Zaragoza y presiden d'o Consello d'a Fabla Aragonesa).
Miercols 19 de mayo:
"L'Aragones en a educazion primaria", por Zesar Biec (profesor de luenga aragonesa en as escuelas "Monte Oroel" y "San Juan de la Pena" de Chaca y secretaire de l'Asoziazion de Profesorau de Luenga Aragonesa).

As dos se faran en l'Aula Magna d'a Faculta de Uesca, a las 20 oras.

-------------------------------------------------------------------------
 ARAGON EN L'ESPORTE CHOBENIL                                Cesar Matias
-------------------------------------------------------------------------
 Me fa goyo beyer os nomes d'equipes de cualsiquier esporte cuan fan referenzia a Aragon, (y si son en aragones, me cuaca muito mas).
Remero que bi eba un equipe, que puede considerar-se "istorico" en o futbol-sala zaragozano que se deziba "colla ra biera", y que tenio (si a memoria no me falla) dos equipes (colla ra biera "A" y "B"). Tamien leyeba con curiosida as pintadas de clarion en o Paseo Independenzia, do meteban o nome d'o equipe.

Yo chugo en un equipe que partizipa en a competizion d'una casa de chobentu, y bi ha bels equipes que tienen o suyo nome en aragones, como:
Aguazella, Esportibo Chugarrins, Os Cucos, Singardaixa. Y atros en o tocante a Aragon, como:
Bulloneros, Leyendas de Aragon, Corona de Aragon.

Tamien sabo que en a competizion d'atra casa de chobentu de Zaragoza bi ha un nome d'equipe parellano (y de seguras bi'n ha beluno mas): Os tablons. Yo creigo que istos nomes aduyan en a creyazion d'un alazet de l'aragones en a chobentu zaragozana, y asinas aspero que en pocas anadas bi aiga un empenton mayor d'a nuestra fabla.

-------------------------------------------------------------------------
 DREITO ARAGONES                                          Cherardo Gimeno
-------------------------------------------------------------------------
 Dende iste fanzine que reculliz me ferba goi poder-tos amanar una mica o esconoxiu dreito foral aragones. En iste aspeuto bi ha muita confusion, y si se me premite dizir-lo a ormino bi ha muita innoranzia, y ya sabez que a innoranzia ye atribida y a toz nos fa ficar a cullara mas d'una bez .
 Gue fablare d'a mayoria d'eda zebil aragonesa. Ista ye una d'as mayors singularidaz d'o dreito zebil aragones, y ye que seguntes l'articlo zinqueno d'a compilazion aragonesa, as presonas mayors de catorze anos pueden fer por si mesmos con toda balura toda clase d'autos y contratos (por exemplo mesmo fer testamento) siempre que siga asistiu , en o sentiu de consello, presenzia y cusirau, d'una persona con autorida familiar. Y anque istos familiars no sigan en a zelebrazion d'o contrato u auto churidico, ixo estara "anulable" pero nunca "nulo" de raso, u siga que si a parti intresada no fa garra quexa, l'auto tendra plena balura.
 En o dreito zebil comun español isto no ye asinas y l'esmo d'os menores de diezigüeito anos no emanzipaus no tiene importanzia a l'ora de dezidir por si mesmos en contratos y demas autos churidicos (art. 1263 Codigo zebil espanol).
 Antimas en Aragon os menores d'eda que faigan casorio, estaran a toz os efeutos consideraus como mayors d'eda, anque ixo si, botar no podran dica que istos no faigan os 18, pos ixe ye un dreito pulitico cusirau por a Costituzion que a ran legal ye mas importan que una compilazion de dreito zebil.

-------------------------------------------------------------------------
 A LEI DE PATRIMONIO ARAGONES                                      Ch. G.
-------------------------------------------------------------------------
 A zaguera lei de patrimonio aragones ba aprebar en o suyo articlo seiseno, por ragon d'o suyo intres cultural, a proteuzion d'as fablas minoritarias d'Aragon e insta a lo gubierno a la creyazion d'una lai de luengas que guarenzie o marco churidico espezifico ta reglar a cofizialida de l'aragones y o catalan.
 Iste ye un chicot trango entadeban, ta la cofizialida, pero talmen siga regulau en una lei que no en tiene muito que beyer con as fablas, sino que caldria que ixa lei se zentra-se en o tema de patrimonio cultural y molimentos y se fese ya d'una bez, que ya cal, a lei de fablas.
 Ixo si, lo que ye sobrebueno y mas importan y a chen que ye en isto d'a esfensa d'as fablas minoritarias no ha parau muita cuenta, ye que por primera begada se nombra en un texto legal, de ran legal, aprebau por las Cortes, a l'aragones y a o catalan como fablas propias d'Aragon. Fa mui pocas anadas mesmo as cortes no reconoxeban a esistenzia de l'aragones como fabla. Y ye que bellas cosas ben d'estar cambeando...
 Asperemos que en a benien lexislatura se aprebe una lei de fablas y ta mayor fazilida ta os churistas y en zaguerias a l'intresau, no tiengamos que escar a proteuzion dos fablans en milenta de leis que en o suyo tetulo cosa tienen que beyer con as fablas.

-------------------------------------------------------------------------
 ZAGUERAS PUBLICAZIONS
-------------------------------------------------------------------------
Libros:
-"En esfensa d'as tabiernas y atros poemas" (Chuse Inazio Nabarro. Ed. Consello d'a Fabla Aragonesa).
-"Nuei de tiedas" (barios autors. Ed. Xordica).
-Lexico aragones de Sos del Rey Catolico (Anton Gil. Ed. Crica).

Discos:
-Ixo Rai, "Entalto".
-Barios autors, "Chicoten 2".

-------------------------------------------------------------------------
 PREMIOS LITERARIOS
-------------------------------------------------------------------------
-Os ganadors d'o II premio literario "Villa de Benasque" ta obras en aragones benasques, han estau: En narratiba, "ex aequo", Jesus Bernat por "Chino-chano ta l'Aneto" y Carmen Castan por "Billeza de sombras", y en poesia Jose Saura por "My sin my soul".

-Os ganadors d'o V premio litarario en aragones "Villa de Sietemo" han estau: En narratiba, "ex aequo", Chabier Tomas por "As colors d'a tardada" y Antonio Leonardo por "Alfredo Serblan" y aczesit ta Baudilio Colominas por "Dura inzertidumbre". En poesia, tamien "ex aequo", Roberto Cortes por "Zagueras indezisions" y Maria Elena Chazal por "Zinta de glarima", y aczesit ta Carmina Paraiso por "Zenos". O premio espezial ta naxius u residens en o Semontano ha estau ta Alfredo Bolsa por "Ro molino".

-O Consello d'a Fabla Aragonesa comboca o Premio Internazional de nobela
curta "Chuse Coarasa". As obras abran d'estar escritas en aragones (en
cualsiquier barieda) y tendran una amplaria d'entre 50 y 150 fuellas (por
una sola cara y a doble espazio). O premio ye dotau con 100.000 pezetas y
a publicazion d'a obra por a editorial Publicazions d'o Consello d'a
Fabla Aragonesa. O plazo d'almision remata o 30 de setiembre de 1999. Os
regles completos se publicaran en a rebista "Fuellas" u pueden demandar-
sen en o Consello d'a Fabla Aragonesa).

-------------------------------------------------------------------------
 MENSACHES CURTOS
-------------------------------------------------------------------------
-A colla mosical La Orquestina del Fabirol, ye parando una reedizion d'o suyo primer disco "Suda, suda fabirol" en CD.

-Tamien podremos trobar luego en as botigas un nuebo disco d'os Titiriteros de Binefar, que lebara por tetulo "A tapar la calle". Amas, a editorial PRAMES ha editau atro CD intresan, o "Archivo de tradicion oral del Moncayo".

-L'Asoziazion chobenil Hora-3 ha inagurau en a suya web una sizion sobre autualida aragonesa, que incluye istos mensaches curtos. Podez bisitarla en http://www.geocities.com/Athens/Agora/9306/mh3a.htm
(trestallo Aragon-Actualidad)

-A "Organitzacio pel Multilinguisme" (OM), ha empentau una campaña ta demandar a presenzia d'as fablas minoritarias de l'estau en os siellos de correus. Ta mas informazion podez bisitar a web (con bersion en aragones): http://www.geocities.com/CapitolHill/Parliament/3265/

-O Rolde Aragones de Barzelona presenta o comic "L'Oro de o Mar" o chuebes 6 de mayo, a las 7 d'a tardi, en a Estazion de Franzia, dentro d'o salon d'autos d'o Salon Internazional d'o Comic de Barzelona.

-A Filmoteca de Zaragoza (plaza San Carlos), dentro d'o ziclo dedicau a o direutor de zine aragones Antonio Artero, fara barias proyeuzions d'o curtometrache en aragones cheso "Pleito a lo sol" (unico documento zinematografico en aragones). Podra beyer-se-ie, chunto a otros curtos, os diyas 12 de mayo (a las 20 oras), o 15 (a las 18 oras), o 21 (a las 22 oras) y o 22 (a las 20 oras).

-O sabado 15 de mayo, a las 22,30 oras, La Ronda de Boltana fara un conzierto en o parque de l'Aljaferia de Zaragoza.

-O Ligallo de Fablans de l'Aragones fara entrega d'os terzers omenaches "Arredol" o 7 de mayo, a las 20 oras, en a sala "Jeronimo Borau" d'o Paraninfo de Zaragoza (plaza Paraiso), coinzidindo con o Diya Europeo d'as Fablas Minoritairas, y que iste ano ye conzediu, a tetulo postumo, a Rafel Andolz Canela. En l'auto, Francho Nagore i dara a charradeta "Una guellada sobre a obra y bida de Mosen Andolz", a escritora chesa Maria Victoria Nicolas dara o rezital "Imachens y parolas en aragones", y a colla mosical "La Birolla" fara una chicota autuazion.

-O 15 de mayo se zelebrara en Monzon una nueba edizion d'a Trobada de Mosica Folk d'Aragon (a las 21 oras, en a plaza Mayor). Bi partiziparan as collas Hato de Foces, Dulzaineros del Bajo Aragon, Mallacan y O Peirot y Compana.

-O Ligallo de Fablans de l'Aragones y l'Asoziazion Cultural Nogara, ya son parando os cursos intensibos d'aragones en estiu. Si querez apuntar-tos-ie podez informar-tos en:
Ligallo de Fablans de L'Aragones: 976 201012, fablans@pangea.org
A.C. Nogara: 976 390708, nogara@posta.unizar.es

-A editorial Gara d'Edizions a inagurau a suya web en: http://come.to/gara
Tamién inauguran web os Gaiters d'a Tierra Plana: http://members.xoom/gaiters

-O diya 28 de mayo, a las 22 oras, a colla folk aragones "Detxusban" fara un conzierto en o bar "El refugio del Crapula" (carrera Mayor de Zaragoza).

-Entre o 1 y o 4 de chulio se zelebrara en Aragues de lo Puerto o terzer festibal de mosica y cultura d'os Pirineos PIR'99. Mas informazion en http://www.losvalles.com

-Tos remeramos que a Colla Unibersitaria por l'Aragones ya ye presen en Uesca, si yes unibersitario en iste campus y quiers aduyar-nos, mete-te en contauto con nusatros.
________________________________________________________________________

Colaboran en iste numero: Cesar Matias, Cherardo Gimeno, Daniel Gonzalez.
_________________________________________________________________________

O Lupo ye un boletin de baldes, ta suscribir-se u dar-se de baxa no cal que nimbiar un mensache ta la nuestra adreza indicando-lo. S'adempribian colaborazions y soxerenzias.
(O Lupo es un boletin gratuito, para suscribirse o darse de baja solo hay que enviar en mensaje a nuestra direccion indicandolo. Se aceptan colaboraciones y sugerencias).
_________________________________________________________________________

              COLLA UNIBERSITARIA POR L'ARAGONES (C.U.A.)
          Edifizio Interfacultaz, Pedro Cerbuna 12, 50009 Zaragoza
                  E-mail: 181991@cienz.unizar.es
_________________________________________________________________________